Go Home

طالع و نازل

<<Back

By: طليع و وسام  

طليع ووسام- طالع و نازل

طليع ووسام- طالع و نازل

<<Back

By: طليع و وسام  



















 من طليع الى أخي وسام بمناسبة ميلاده:

قد ما قصر الغياب، طال الغيـــــــاب                  زينة العيــــش حباب ما بين الحباب

ورغم الرحيل بقيت ســـاكن بالفؤاد                   وطيفك بفكري متل عالخلة الضباب

ومتل النهر حامل معو جود الوهـاد                   دبّ الحياة باليابس وفرّخ عشـــــاب

ومتل الشمس محّت من الليل السواد                 ومتل الثلج فارش ملاحف عالهضاب

ومتل طلّة عيـــــــــــد عوجوه الولاد                 ومتل شيخ وعاودو زهو الشــــــباب

ومتل البجرجوع انتصب رابع عماد                   وصافي وسجد تا يحرسوها وبوركاب

وكـــــــــــــــل يوم الفيه فرّقنا البعاد                 مرقتو ما زادت بعمري حســــــــــاب

بئســـــف عكرّ الوقت كلما عيد عاد                   وكل جَمعة ما انجمع فيها وســــــــام

بس بفرح كلما بيؤوب آب               1/8/2014

من وسام الى أخي طليع بمناسبة ميلاده:

لمّا بآب تّاوبت لحقـــــــــــــول                          ونعس الشجر، وتحردب المحصول

دقّ الشّــــــــــتي عبوابها تتفيق                    بكفّ اللي كمّو بالمطــــــــــر مبلول

ومن بعد ما شبع النظر تحديق                     مع فجر رابع يوم مــــــــــــن أيلول

قال: جايب للشــــــــباب رفيق                      للطفل بســــــــــــــمة، للحكيم عقول

يا اســــــم عمسمّى عليك يليق                     يا ســــــــيف شعر بخاطري مسلول

يا شهد كلمة مقطّرة عالـــريق                     يا مســــــــــــتحيل مجرجر المعقول

        ما قدرت قول الكان بدّي قول

ميلادك الغــــــــالي إلي عبرة                    وبكرا منوعى  من بعــــد ســـــكرة

منعود عا درب الحياة نجوز                     تنصير مــــــــــــن بعد العمر ذكرى

لكن ندهلي صوت من فيروز                      دندن على وتار القلب حســـــــــــرة

وغنّت: حرام الهجر ما بيجوز                 "تبقوا اذكروني بالســـــــــــنة مرة"     

4/9/2014      

طليع:

ديك شعرك خرّس الديك الفصـــــــيح          ويا طالعة يا نازلة بتلعب منيح

رفعْتك على مساواة صافي وبوركاب          ونزّلتني عا مهد ياسوع المسيح

وسام:

يا شاعر الاسمك منارة  بالحمى             وأبيات شعرك موج عالشاطي طمى

طلّعتني عجبال أعلا من الغيوم               ونزّلتك على مهد أعلا من السما

طليع:

متلك أنا بالشّعر متعشّق وَلوع               اسمي طليع ومسلكي الدرب الطلوع

نازل رغم أنفي عبيروت التّنين              وعالنار مستنظر عجرجوع الرجوع

 

وسام:

بيروت عا جرجوع طلعة مولّهة             عوف العواطف ساكتة وحاكي النّهى

شوف العلم بالناس نضحة آلهة             عرفو الارض مكوّرة مـــــن أصلها

طيارتك صوب الفضا بتشدّ فيك              تا تنزل بجــــــرجوع من تاني جهة

طليع

طيارتي بيروت حطّت شانها                 وتمرّدت جرجوع عـــــــــا قبطانها

وطلُعت عالخلة على بستانها                  وزرعت من أشـــــــكالها وألوانها

ظل البصل والثوم لاطي بالتلام               "والتين والزيـــــتون" عا أغصانها

وسام:

لوما شلوش التّين تنزل بالتـّـــــراب           من وين غصنك شاف حالو عاليباب

ولو كنت نقطة مَي بجناح السحاب            منّي إلي بتعود من بعـــــــــد الغياب

تحت الصحاري كنوز من ماس وذهب       من فوقها الظمآن شـــــــبّعتو سراب

 

طليع:

لوما شعاع الشمس يشـــــــرق بالحياة       لا المَي كانت او شلـــش فرّخ نبات

وظل الذّهب بالأرض مجهول الصفات       الا عتاج العرش او جيد الفتـــــــاة

بعد الممات الروح طلعت عالســــــما       والأرض ما بيبقالها غير الرفـــــاة

وسام:

 من قبل ما نصفّي بشر صوتن دوى         نزلنا على الارحام في ليل الغوى

ونزّل الرحمــــــــة والكتب لما نوى        يخلق بشر، تا عاد عالعرش استوى

ولوما شعاع الشمس عالديرة هوى         ما كان زيــــــتونك حلي وكوّن نوا

وقانون اســـمو الجاذبية نــــــزّلك          خلاك تمشي عالأرض مش بالهوا

طليع:

الله بفردوسو خلق أول بشــــــر             مش عالارض، في هالفرض عيد النظر

ولمـــــا انغوت حوّا وآدم بالثمر             الله على الدنيا أمرهم بالســــــــــــــــــفر

والجاذبـــــــية جرمها ما بينغفر             كم ألف واقع عالارض عظمو انكســــر

العلم دافع ضدها فــاتح طموح              تا يفتح المريخ من بعد القمـــــــــــــــــر

وسام

عالقافية رح اتبعك معنى وأثر               تنشـــــــوف مين اللّازم يعيد النظر

لما إله الكون بالكــــــون افتكر               يعمل بشر، من وين كوّن هالبشر

جبلة تراب ومي، خالقنا أمــــر               كوني، وشـــــرّف آدم ومنها ظهر

ومزبوط، عكس الجاذبية عالقمر            عم يطلعوا تا حاجز الصوت انشطر

لكن ما تنسى كيف صاروخك عبر           بالجو علّا  تنقصـــــــر عنو البصر

من دون بترول انوجد طيّ الحفر            ظلّو ب( ناسا ) جامد ومثلو الحجر

ومعليش لولا العظم عالوقعة انكسر         عالي الأنف، أعمى القلب بالمختصر

ولما تناجي ربك بليل الذنـــــــوب          اركع  وأســــــــجد  تا ذنوبك تنغفر

طليع:

يا نسر آمِن بس في عينو الخطر           عالارض شاف الارنب وفوقو انهمر

يا منارة شـــــــــط والجو اعتكر           يا شجرة الأرز، يا اســــــــما الشجر

لوما ســـــــليمان النبي منّك نشر           أخشاب عرشو كان عصرو ما ازدهر

ويا حـــسام الما هبَر حتى انشهر           ويا وســــــــــــام الصدر بالعز افتخر

قولك الصـــــــلصال بالجنة ندر             حـــــــــتى من تراب الدني الله حفر؟

وصاروخ اطباق السما لما مخر             خــــــزان هيدروجين عا ظهرو أزر

والوالدة شو ذنبها ظهرا انكسر              صبــــــرت ععلّتها (ولا يحلو المقر)

اركع واسجد قبل ما الليل احتظر            أو بعد ما تشـــــــــعر بأنفاس السَّحر

وعند الدعا أرفع كفوفك للســـما            الا دعا الله ذنوبك ما غفــــــــــــــــر

وسام:

خيي طليع اتطلّع بنـــــــــص الإلو          ونُصّي النازل ليـــــــــش عم يتجاهلو

السيف اعتلا من فوق زند الحاملو          لولا ما ينزل كيف خصمـــــــو جندلو؟

ولما النـــــبي للعرش أرزك حمّلو           لوما أســـــــــــــاسو كان ضيّع مدخلو

وعابر فضـــا بالهدروجين مشعّلو          (طردو العكسي) بالسـّــــــما عم يشئلو

ونســـورك اللي بجانحين ترسملو           عم ينزلوا تيفقّســــــــــــــــو ويزغللو

بين طـــــالع ونازل جوابك عدّلو            وفضل الكـــــــــــــرم بالنازلين تأملو

ضهر السفينة نجيت وزن تحمّلو            بتغطــــــــــــس لنصّا تالوزن تتحمّلو

وعطشان فوق البير بيدندل دلو              وبيرجّعـــو فاضي (العمى ما أبخلو)

 ولما(طلع خلقك)حكيت بلا وعي            ولما (طلع ضغطك) ركضت تنزّلو

طليع:

كنت رح جاوب قبل ما تلفظ الجيم           بس فزعت تغرق ببعد الياء ميم

راقد بفرشي وعلّتي مالها حكيــــم          نازل عليي عارض الرشح اللئيم

وعتّم ضلوعي وقعة الليل البهيم             اطلع يا ضو الصبح بالثغر البسيم

صياد متلك ما رمى بالصيد ريم             إلا بطلعة ضرب صابو بالصميم

ولما بتشــــرين النبع صفّى فطيم           نوار فار وطلّع النبع الكــــــــــريم

والنخل عامل من رمل واحة نعيم           طالع ما راجع يلتفت صوب الأديم

مش مستحية غصنها سادل هزيم           يا ضياع الجو بالغصـــــــن العقيم

وفيروز كان بيختنق صوتا الرخيم           لوما طلع نغمة على مواج النسيم

ولوما عراس الطّور موسى يعتلي          ما قرّبو اللــــــــه ولا صفّى كـليم

وسام:

خيي وقع بالرشح الله يسلمو                 بنزل دوا بشـــــــريان دمّو بحكّمو

نبعك اذا بنوار طلّق منجمو                  رح تخطبو الوادي وطريقو تسلّمو

وزرّ الورد تيفيق عطرو بمبسمو            بينزل ندى عالفجـــــــر حتى يحمّمو

وبذر الجنى حتى يكرر موسمو              مهد الارض عا حضن دافي بيعزمو

وللنوم لما عيونك بيستســــــلمو            جفونـــــــــك برادي بينزلو تا يحلمو

وأفكارك بنسيان رح يتــشرذمو             لوما بريشـــة وحبر عالورقة ارتموا

وتا ينزل الوحـــي الالهي علّمو              آيات، حتى بإســـــــــــــم الله تمتموا

وموسى عندما تجرّأ على مُلْهِمو            تا صار بدّو يشـــــــوف وجّ معلمو

قلّو نعالك إخلعــــو بوادي طوى             من قبل ما عالطّور اللــــــــــه يكلمو

طليع ختام:

حضَرت البدر في ليلة كــــمالو              ببحر الأطلســـــــي يبلبل ذيالو

وعلى جنابو شمايل من جدايل               جدايل نور صوب الشرق مالو

قلت يا بدر بســــــنيني الاوائل              كنت لبــــــنان طالك عن جبالو

صرلك وقت مــــن لبنان طالل               كيفو، كيف حالو، كيف عيالو؟

قلّي بعدني عالغــــــرب واصل               بعد مَ سمعت بالغرب وجمالو

وإلي بالكون (دوّيرة) منــــازل              (شعاعا) مرجح الارض بحبالو

و (مركز) محوري بجبال عامل             ما برضى مركز الجنة بدالو

وخيي حاج بين طالع ونــــــازل             شاغل حال حالك حال حالو

فهمت بالفن في عندك مراجــــل            بقول الشعر من خيرة القالوا

لكن ظل خيط الوصـــــل غازل               وصـــــــفاء الودّ نبقالو مثالو

وكلمة طيبة بالارض واغــــــل              أصلا، وبالسما فروعا تعالوا

ونرضى بالقدر ميزان عــــادل:             ما في وادي بدون جبال حدّا

        ولا طالع بلا نازل قبالو

 

 

وسام ختام:

عندما الشمـــس كانت عم تغفّي             وجدايل نورها مــن الكون تئفي

البحر صفّا يغـــــازلها، وغازل              بقايا النور عالموجـــــــات زفّة

ولمن باســــــــــها عا خدّ ناحل             شـــعلت عاطفة، ورجعت تدفّي

وخجلها بالســـــما ضوّا مشاعل            بنــــــــت عنقود والغيمات قفّة

وصارت تعصر الأحمر جداول               عتمّ البحــــــــر ومواجو تأفّي

وحتى يســـــجلو المجهول فاعل            صارت نورها من الكون تطفي

 

يا شمس النازلي تضوي منازل              بلاد الغـــــــرب، خيي لا تأفّي

وعلى بابو نزلي بروس الأنامل              دقّي، وفرفـــــكي عيونو بخفة

وقولي: من وسامك في رسايل              كتبها بحبر شــوق وريش لهفة

اذا بدّك من ســـــــنينو مراحل              إنزل حوّش ســــــــنينو وكفّي

 

أنا بشـــــعري الك منّي مجامل              جوابك عـــــرّق نحاسات دفّي

يا خيي للحـــرف عندك مغازل               عم تحــــوك القصيد وعم تقفّي

وحتى الحرف معنى يصير حامل            أنا شـــــــــفّة وإنت للّفظ  شفّة

ونحنا جفن طــــــالع جفن نازل              تنقشــــــــع بعضنا مع كل رفّة

وحبّة بتنزل  بتطلـــــع سنابل                وزقـــــفة: نكفّ كفّك كفّ كفّي

وبدي ياك بالي تظل شــــــاغل              بشعرك: والعمر بالشعر يوقف

                          على الخمسين او تحتو بنتفة

                                                   انتهت بتاريخ23/ 9/ 2014    
Adidas Gazelle pulseras pandora zapatillas converse ropa hollister Zapatillas puma zapatos jordan nike shox nike air max mujer joyas tiffany nike huarache polo ralph lauren Zapatillas adidas air max zapatos louis vuitton Adidas Superstar Zapatos adidas zapatos christian louboutin bolsos michael kors nike air max nike roshe


Website created and hosted by Reggie's PC Resources, LLC